އަތޮޅުތަކުގައި ތެޔޮ ރައްކާކުރާ ނިޒާމު ގާއިމުކުރަނީ

ހުރިހާ އަތޮޅެއްގައި ތެޔޮ ރައްކާކުރެވޭ ނިޒާމު ގާއިމުކުރުމުގެ މަޝްރޫއު އިފްތިތާހުކޮށްފި އެވެ.

ރައީސް އޮފީހުގައި މިއަދު ބޭއްވި ރަސްމިއްޔާތެއްގައި މި މަޝްރޫއު އިފްތިތާހުކޮށް ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.

މި މަޝްރޫއުގެ އަމާޒަކީ ފެބްރުއަރީ 2026 ގެ ކުރިން ރާއްޖޭގެ ހުރިހާ އަތޮޅެއްގައި ފިއުލް ސެޓަޕް ގާއިމުކޮށް މަސްވެރިންނާއި އާންމުންނަށް ތެޔޮ ލިބޭނޭ ނިޒާމު ގާއިމުކުރުން ކަމަށް ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރު ޝިމާދް އިބްރާހިމް ވިދާޅުވި އެވެ.

އެގޮތުން މިއަހަރުގެ ޖެނުއަރީ މަހު ހުޅުމާލޭގައި ސެޓަޕް ގާއިމުކޮށްފައިވާއިރު ޅ. ފެލިވަރާއި ގއ. ކޫއްޑޫގައި ހުންނަ އެފްއެސްއެމް ޝެޑުން ހެޔޮ އަގުގައި ދަނީ ތެޔޮ ފޯރުކޮށްދެމުންނެވެ.

އަންނަ އަހަރުގެ ނިޔަލަށް ހިދުމަތް ގާއިމުކުރާ ރަށްތަކަކީ ހއ. އިހަވަންދޫ، ހދ. ހަނިމާދޫ، ފ. ނިލަންދޫ، ގދ. ފަރެސްމާތޮޑާ، ފުވައްމުލައް ސިޓީ އަދި އައްޑޫ ސިޓީ ހުޅުމީދޫ އެވެ.

މީގެ އިތުރުން ށ. މިލަންދޫ، ނ. މަނަދޫ، ބ. ތުޅާދޫ، ވ. ފެލިދޫ، ތ. ހިރިލަންދޫ، ރ. ދުވާފަރު، އއ. މަތިވެރި، މ. މުލައް، ދ. ކުޑަހުވަދޫ އަދި ލ. ގަމުގައި ފެބްރުއަރީ 2026 ގެ ނިޔަލަށް މި ސެޓަޕް ގާއިމުކުރުމަށް ވަނީ ހަމަޖެހިފަ އެވެ.