އާސަންދަ ހުއްޓާލައި އަލުން ފަށަންވީ: ނާޒިމް
އާސަންދަ ދޫކޮށްލުމަށްފަހު އަލުން ފަށަން ވިސްނަން ޖެހިފައިވާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި ބަޖެޓަށް ބަހުސް ކުރައްވަމުން ނާޒިމް ވިދާޅުވީ ސިއްހީ ދާއިރާގައި ހުރި މައްސަލަތައް ބޮޑު ކަމަށާއި އާސަންދަ އާއި އެންސްޕާ އިން ބޭކާރު ހަރަދުތައް ކުރަމުންދާ ކަމަށެވެ.
"އާސަންދަ މިވަނީ ރަނގަޅު ނުކުރެވޭ ވަރަށް ރިފޯމް ނުކުރެވޭ ވަރަށް ގޯސްވެފައި. އަސްލު ކެންސަރު ޖެހިފައިވަނީ އާސަންދައަށް. އެހެންވީމާ އަޅުގަނޑުމެން އެބަޖެހޭ ވިސްނުމެއް ގެންގުޅެން އަޅުގަނޑުމެން އެއާ މޯލްޑިވްސް އާއި ދެން އެހެން ކުންފުނިތައްވެސް ދޫކޮށްލި ފަދައިން އާސަންދަ ދޫކޮށްލައިފަ އަލުންބަލުން ފަށަންވީ ކަމާ ދޭތެރޭ އަޅުގަނޑުމެން ވަރަށް ފުންކޮށް ވިސްނަން އެބަޖެހޭ،" ނާޒިމް ވިދާޅުވި އެވެ.
ނާޒިމް ވިދާޅުވީ އާސަންދަ އާއި ރާއްޖެއިން ބޭރުގެ ހޮސްޕިޓަލްތަކާ ދެމެދުވެފައިވާ އެއްބަސްވުންތަކުގައި މެދުވެރިއަކު ހުންނަކަން ކަށަވަރުކުރެވޭ ކަމަށެވެ.
"ސަބަބަކީ ޗާޖުކޮށްފަ ހުންނަ އަގުތަކަކީ ގަބޫލުކުރަން ދަތި ވަރަށް ބޮޑެތި އަގުތަކެއް،" ނާޒިމް ވިދާޅުވި އެވެ.
އެ އެއްބަސްވުންތައް ހުރީ ބައި އެޅޭ ގޮތަށް ކަމަށާއި އެ އެގްރިމެންޓްތަކުގައި މި ސަރުކާރުން ދެމި ތިބެން ނުޖެހޭ ކަމަށް ނާޒިމް ވިދާޅުވި އެވެ.
