ފޭދޫ ބަނދަރު ތަރައްގީކޮށްފި

ށ. ފޭދޫ ބަނދަރު ތަރައްގީ ކުރުމުގެ މަޝްރޫއު ނިންމާލައިފި އެވެ.

އެމްޓިސީސީން އިން ބުނި ގޮތުގައި މި މަޝްރޫއުގެ ދަށުން 25،456 ކިއުބިކް މީޓަރުގެ ސަރަހައްދެއްގައި ބަނދަރު ފުންކުރުމާއި 9،000 ކިއުބިކް މީޓަރުގެ ސަރަހައްދެއްގެ ނެރު ވަނީ ފުންކޮށްފަ އެވެ.

މި މަޝްރޫއުގެ ދަށުން 280 މީޓަރުގެ ސަރަހައްދެއްގައި އެއްގަމުތޮށި ލާފައިވާއިރު 110 މީޓަރުގެ ސަރަހައްދެއްގައި ރިވެޓްމެންޓް ޖަހާފައިވެ އެވެ.

މީގެ އިތުރުން 317 މީޓަރުގެ ސަރަހައްދެއްގައި ބޭރުތޮށި ލާފައިވާއިރު 1،782 އަކަ މީޓަރުގެ ސަރަހައްދެއްގައި ހާބަ ޕޭވްމަންޓް ހަދާފައިވެ އެވެ.

މި މަޝްރޫއުގެ ދަށުން މޫރިން ބޯއީސް ހަރުކޮށް ނެރު ބައްތި އާއި ބަނދަރު ބައްތި ހަރުކޮށްފައިވާ ކަމަށް އެމްޓިސީސީން ވަނީ ބުނެފަ އެވެ.

ޕްލޭނިން މިނިސްޓްރީން މި މަޝްރޫއު އެމްޓިސީސީ އާ ހަވާލުކުރީ 35 މިލިއަން ރުފިޔާ އަށެވެ.