ފުރަތަމަ ކުއާޓަރުގައި މީރާއަށް 4.9 ބިލިއަން ރުފިޔާ
މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން، މިއަހަރުގެ ފުރަތަމަ ކުއާޓަރުގައި 4.93 ބިލިއަން ރުފިޔާ ބަލައިގެންފިއެވެ. މިއީ މިދިޔަ އަހަރުގެ ފުރަތަމަ ކުއާޓަރާ އަޅައިބަލާއިރު 1.3 އިންސައްތައިގެ ދަށްވުމެކެވެ.
މީރާއިން އާންމުކުރި ކުއާޓަރލީ ރިޕޯޓްގައިވާ ގޮތުން، މިއަހަރުގެ ފުރަތަމަ ކުއާޓަރުގައި ލިބުނު އާމްދަނީއަކީ ލިބޭނެ ކަމަށް އަންދާޒާކުރި އާމްދަނިއާ އަޅައިބަލާއިރު 3.1 އިންސައްތައިގެ ދަށްވުމެކެވެ.
އާމްދަނީ ދަށްވުމުގެ މައިގަނޑު ސަބަބަކީ ބީޕީޓީ އާއި ޓީޖީއެސްޓީ އާއި ގްރީން ޓެކްސް އަދި ބިން ވިއްކުމާއި ބިން ބަދަލުކުރުމުގެ ފީ އިން ބަލައިގަނެފައިވާ އާމްދަނީ ދަށްވެފައިވުން ކަމަށާއި ގިނަ އަދަދެއްގެ ޓެކްސްޕޭޔަރުން ގަޑިއަށް ބަޔާން ހުށަހަޅައި ފައިސާ ދައްކައިފައި ނުވާ ކަމަށް މީރާ އިން ބުނެއެވެ.
މިއަހަރުގެ ފުރަތަމަ ކުއާޓަރުގައި މީރާއަށް އެންމެ ގިނައިން އާމްދަނީ ލިބިފައިވަނީ ޖީއެސްޓީގެ ގޮތުގައެވެ. އެ ކުއާޓަރުގައި މީރާއަށް ލިބުނު އާމްދަނީގެ 47.1 އިންސައްތައަކީ ޖީއެސްޓީގެ ގޮތުގައި ލިބުނު އާމްދަނީއެވެ. ދެވަނައަށް އެންމެ ގިނައިން އާމްދަނީ ލިބިފައިވަނީ ބީޕީޓީގެ ގޮތުގައެވެ. އެއީ 22.4 އިންސައްތައެވެ.
