މިދިޔަ މަހު މީރާއަށް އެއް ބިލިއަން ރުފިޔާ ލިބިއްޖެ

މިއަހަރުގެ އެޕްރީލް މަހު، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) މެދުވެރިކޮށް ދައުލަތަށް 1.3 ބިލިއަން ރުފިޔާ ލިބިއްޖެއެވެ.

މީރާއިން އާންމުކުރި ތަފާސްހިސާބުތައް ދައްކާ ގޮތުން މިދިޔަ މަހު ލިބުނު އާމްދަނީއަކީ އެ މަހު ލިބޭނެ ކަމަށް އަންދާޒާ ކުރި މިންވަރަށްވުރެ 6.3 އިންސައްތަ އިތުރު މިންވަރެކެވެ. އަދި 2018 ވަނަ އަހަރުގެ އެޕްރީލް މަހު ލިބުނު އާމްދަނީއަށްވުރެ 12.6 އިންސައްތަ އިތުރުވުމެކެވެ.

މިދިޔަ މަހު މީރާއަށް ލިބުނު އާމްދަނީގެ ތެރޭގައި، ޑޮލަރުގެ ގޮތުގައި ބަލައިގަތް 55.9 މިލިއަން ޑޮލަރު ހިމެނެއެވެ.

އެޕްރީލް މަހު މީރާއަށް ލިބުނު އާމްދަނީގެ 67.1 އިންސައްތައަކީ ޖީއެސްޓީގެ ގޮތުގައި މީރާއަށް ލިބުނު އާމްދަނީއެވެ. ޖީއެސްޓީގެ ގޮތުގައި ނިމިގެންދިޔަ އެޕްރީލް މަހު މީރާއަށް 875 މިލިއަން ރުފިޔާ ލިބިފައިވެއެވެ.