މިފްކޯ އިން ގޭގެއަށް ޑެލިވަރީކޮށްދިނުން މެދުކަނޑާލައިފި

މިފްކޯ އިން ގޭގެއަށް ޑެލިވަރީކޮށްދިނުމުގެ ހިދުމަތް މެދުކަނޑާލައިފިއެވެ.

މާލެއިން ކޮވިޑް-19 ގެ ކޭހެއް ފެނި، މާލެ ސަރަހައްދު ލޮކްޑައުން ކުރުމާއި ގުޅިގެން މިފްކޯ އިން ވަނީ މާލެ އަދި ހުޅުމާލޭގެ ގޭގެއަށް ޑެލިވަރީކޮށްދިނުމުގެ ހިދުމަތް ފަށާފައެވެ. ނަމަވެސް އެ ހިދުމަތް މިހާރު ވަނީ މެދުކަނޑާލާފައެވެ.

މިފްކޯ އިން ބުނީ މިހާރުގެ ހާލަތު ހުރި ގޮތުން، މުވައްޒަފުންނާއި ކަސްޓަމަރުންގެ ސަލާމަތަށް ވިސްނާ، ގޭގެއަށް ގެންގޮސްދިނުމުގެ ހިދުމަތް މެދުކަނޑާލާފައިވާ ކަމަށެވެ. ގޭގެއަށް ޑެލިވަރީކޮށްދިނުމުގެ ހިދުމަތް މެދުކަނޑާލި ނަމަވެސް، މަސްފިހާރައިގައި ރަޖިސްޓްރީކޮށްފައިވާ ވިޔަފާރިތަކަށް މާފަންނުގެ މިފްކޯ މަސްފިހާރަ އަދި ހުޅުމާލޭ ފިހާރައަށް ދިޔުމުން ހިދުމަތް ލިބޭނެ ކަމަށް މިފްކޯ އިން ވަނީ ބުނެފައެވެ.

ފިހާރަތަކަށް ހިދުމަތް ލިބޭނީ ހެނދުނު 09:30 އިން ހަވީރު 06:00 އަށެވެ. ފިހާރަތަކުން ހިދުމަތް ހޯދުމަށް މިފްކޯ ފިހާރަތަކަށްދާއިރު މާސްކް އަދި އަންގި ބޭނުން ކުރުމަށް މިފްކޯ އިން ވަނީ އިލްތިމާސްކޮށްފައެވެ.

މިފްކޯ އިން ބުނި ގޮތުގައި ހިދުމަތް ދެވޭނީ ހުއްދަދެވިފައިވާ އުޅަނދުފަހަރަށް އަދި ކަސްޓަމަރުންނަށެވެ. ހިދުމަތް ހޯދަން މިފްކޯއަށް ދާއިރު، ސިއްހީ ފަރާތްތަކުން އިރުޝާދުދީފައިވާ ގައިދުރުމިން ގެންގުޅެންވާނެ ކަމަށް މިފްކޯއިން ވަނީ ބުނެފައެވެ.