މަންޓާ އެއާގެ ސީޕްލޭން ދަތުރުތަކަށް އިތުރު ފްލައިޓެއް ގެނެސްފި
މަންޓާ އެއާގެ ސީޕްލޭން ދަތުރުތަކުގައި ބޭނުންކުރުމަށް އިތުރު ފްލައިޓެއް ގެނެސްފިއެވެ.
ޑީއެޗްސީ 6 ޓްވިން އޮޓާ މަރުކާގެ މި ފްލައިޓް ރާއްޖެ ގެނެސްފައިވަނީ އިއްޔެ ހަވީރުއެވެ. އެ ފްލައިޓް ގެނައިކަން ހާމަކޮށް މަންޓާ އެއާއިން ބުނީ އެ އެއާލައިންގެ ސީޕްލޭން ދަތުރުތައް ވަރަށް އަވަހަށް ފެށިގެންދާނެ ކަމަށެވެ.
މަންޓާ އެއާ އިން ސީޕްލޭން ދަތުރުތައް ފެށުމަށް ނިންމާ މިދިޔަ މަހު ވަނީ ތިން ފްލައިޓް ރާއްޖެ ގެނެސްފައެވެ. އަދި ސީޕްލޭން ދަތުރުތައް ކުރުމަށް ބައެއް ފްލައިޓްގައި މިހާރު ވަނީ ކަނދު ހަރުކޮށްފައެވެ.
މި އަހަރު ނިމުމުގެ ކުރިން މަންޓާ އެއާގެ ސީޕްލޭން ފްލީޓް 10 އަކަށް އިތުރުކުރުމަށް އެ އެއާލައިނުން ވަނީ ނިންމާފައެވެ.
މަންޓާ އެއާއިން މިހާރުވެސް ދަނީ ދާލު އެއާޕޯޓަށާއި ދަރަވަންދޫ އެއާޕޯޓަށް ދަތުރުތައް ބާއްވަމުންނެވެ. އެ ދަތުރުތަކަށް އެ އެއާލައިނުން ބޭނުންކުރަނީ އޭޓީއާރް 600-72 މަރުކާގެ ފްލައިޓެވެ.
