ފުވައްމުލަކުގައި ގާޑިޔަލުގައި ވިޔަފާރިކުރުމާއި ބެހޭ އުސޫލެއް ހަދައިފި

ފުވައްމުލަކު ސިޓީގެ މަގުތަކާއި މީހުން ދިރިއުޅުމަށް ދޫކޮށްފައިވާ ގޯތިތަކުގައި ގާޑިޔާ ނުވަތަ މޭޒު ބަހައްޓައިގެން ވިޔަފާރި ކުރުމާއި ބެހޭ އުސޫލެއް އެކުލަވާލައިފިއެވެ.

ފުވައްމުލަކު ސިޓީ ކައުންސިލުން އެކުވަލާއި އެ އުސޫލުގެ ދަށުން ގާޑިޔާ ނުވަތަ މޭޒު ބަހައްޓައިގެން ވިޔަފާރި ކުރެވޭނީ އެ އިދާރާގައި ރަޖިސްޓްރީކޮށްފައިވާ ފަރާތްތަކަށެވެ.

ގަވާއިދުގައިވާ ގޮތުން ގާޑިޔާ ނުވަތަ މޭޒު ރަޖިސްޓްރީކުރާ ފަރާތްތަކުން މަހުފީއެއްގެ ގޮތުގައި 500 ރުފިޔާ ފުވައްމުލަކު ސިޓީ ކައުންސިލަށް ދައްކަންޖެހޭނެއެވެ.

ގާޑިޔާ ނުވަތަ މޭޒު ބަހައްޓައިގެން ވިޔަފާރިކުރާ ފަރާތްތަކުން މިމަހުގެ 15 ވަނަ ދުވަހުގެ ނިޔަލަށް ރަޖިސްޓްރީކުރުމަށް ފުވައްމުލަކު ސިޓީ ކައުންސިލުން ވަނީ އަންގާފައެެވެ. އެ ދުވަހާއި ހަމައަށް ރަޖިސްޓްރީ ނުވާ ފަރާތްތަކުގެ ގާޑިޔާ ނުވަތަ މޭޒު ނެގުމުގެ އިހުތިޔާރު ފުވައްމުލަކު ސިޓީ ކައުންސިލަށް ލިބެއެވެ.

ފުވައްމުލަކު ސިޓީ ކައުންސިލުން ބުނި ގޮތުގައި، ގާޑިޔާ ނުވަތަ މޭޒު ބަހައްޓައިގެން ވިޔަފާރިކުރުމަށް ރަޖިސްޓްރީވުމަށް އެދޭ ފޯމު ފުވައްމުލަކު ސިޓީ ކައުންސިލް އިދާރާއިންނާއި އެ އިދާރާގެ ފޭސްބުކް ޕޭޖުން ލިބޭނެއެވެ.