ފުޑް.އެމްވީ - އެއްތަނަކުން ހުރިހާ މެނޫތަކެއް ބަލައިލާ އޯޑަރުކޮށްލާ!
ކެފޭ، ރެސްޓޯރަންޓްތަކުން ވިއްކާ ކާބޯތަކެއްޗާއި އޭގެ އަގުތަކުގެ މައުލޫމާތު ހިމެނޭ ވެބްސައިޓް "ފުޑް.އެމްވީ" ލޯންޗްކޮށްފިއެވެ.
މިރޭ ލޯންޗްކުރި އެ ވެބްސައިޓަކީ، ވެބް ޑިޒައިން އާއި އެޕް ޑިވެލޮޕްމަންޓްގެ ހިދުމަތް ދެމުން އަންނަ ކުންފުނި، "ޖަވާބު ޕްރައިވެޓް ލިމިޓެޑް" ގެ ދަށުން ހިންގަމުން އަންނަ ވެބްސައިޓެކެވެ. އެ ވެބްސައިޓާއި ގުޅޭ ގޮތުން ކުންފުނީގެ ސީއީއޯ މުހައްމަދު ޖައިލަމް ވިދާޅުވީ "ފުޑް.އެމްވީ" ގައި ރަޖިސްޓްރީވުމަށް އެދޭ ކެފޭ، ރެސްޓޯރަންޓްތަކަށް އެ ފުރުސަތު ހުޅުވާލާފައިވާ ކަމަށެވެ.
"މި ދުވަސްވަރަކީ ކޮވިޑް-19 ފެތުރެމުންދާ ދުވަސްވަރަކަށްވާތީ، ވެބްސައިޓްގައި ރަޖިސްޓްރީވުމަށް ހުށަހަޅާ ފަރާތްތަކުން އަޅުގަނޑުމެން ރެޖިސްޓްރޭޝަން ފީއެއް ނުނަގާނަން" މުހައްމަދު ޖައިލަމް ވިދާޅުވިއެވެ.
މާލޭގެ ކެފޭ، ރެސްޓޯރަންޓްތައް ހިމެނޭ ގޮތަށް މިހާރުވެސް 39 ތަނަކުން ލިބެން ހުރި ކާބޯތަކެއްޗާއި އޭގެ އަގުތައް އެ ވެބްސައިޓްގައި ހިމަނާފައިވެއެވެ. ބޭނުންވާ ކާ އެއްޗެއް، ވެބްސައިޓް މެދުވެރިކޮށް ސާޗްކޮށްލެވޭއިރު، އެ އައިޓަމް އެކި ރެސްޓޯރަންޓްތަކުން ލިބެން ހުރި އަގުތައް އެއް ޕޭޖަކުން ބަލައިލެވޭނެއެވެ. އަދި ޑެލިވަރީގެ ހިދުމަތް ދޭ ރެސްޓޯރަންޓްތައް އެނގޭނެ ގޮތަށް ވެބްސައިޓްގައި ފާހަގަކޮށްފައިވެއެވެ.
"ވެބްސައިޓްގައިވާނެ އެ ކެފޭ ނުވަތަ ރެސްޓޯރަންޓަކަށް ގުޅޭނެ ނަންބަރު. ކާ އެއްޗަކަށް އޯޑަރު ކޮށްލަށްވަން ބޭނުންފުޅުނަމަ ސީދާ އެ ކެފޭ ނުވަތަ ރެސްޓޯރަންޓަކަށް ގުޅުއްވައިގެން އޯޑަރު ކޮށްލެވޭނެ. ޑެލިވަރީކޮށްދޭނީވެސް އެ ކެފޭ ނުވަތަ ރެސްޓޯރަންޓަކުން" މުގައްމަދު ޖައިލަމް ވިދާޅުވިއެވެ.
ރާއްޖޭގެ ކޮންމެ ރަށެއްގައި ހުރި ކެފޭ ނުވަތަ ރެސްޓޯރަންޓަކަށްވެސް ވެބްސައިޓްގައި ރަޖިސްޓްރީވެވޭނެ ކަމަށް ޖައިލަމް ވިދާޅުވިއެވެ. "ފުޑް.އެމްވީ" ގައި ރަޖިސްޓްރީވުމަށާއި އިތުރު މައުލޫމާތު ހޯދުމަށް މެއިލް ކުރައްވާނީ [email protected] އަށެވެ.
