ބޮމްބާޑިއާގެ އެވޯޑެއް މޯލްޑިވިއަންއަށް

ކެނެޑާގެ މަތިންދާބޯޓު އުފައްދާ ކުންފުނި، ބޮމްބާޑިއާ އިން ދޭ އެވޯޑެއް ރާއްޖޭގެ ގައުމީ އެއާލައިން މޯލްޑިވިއަންއަށް ލިބިއްޖެއެވެ. މިއީ މި އެވޯޑް އެ އެއާލައިނަށް ލިބުނު ހަތްވަނަ ފަހަރެވެ.

މޯލްޑިވިއަންއަށް ލިބިފައިވަނީ ބޮމްބާޑިއާ އިން ދޭ އެއާލައިން ރިލައިބިލިޓީ އެވޯޑް 2018 އެވެ. މޯލްޑިވިއަނަށް އެ އެވޯޑް ލިބިފައިވަނީ ކިޔު 100 އާއި 200 އަދި 300 އެއާކްރާފްޓް ޕްރޮގްރާމް ކެޓަގަރީން އޯޝޭނިއާ ގައުމުތަކާއި ވާދަކޮށްގެންނެވެ.

ރާއްޖޭގެ އެތެރޭގެ އުދުހުންތަކުގައި، ގައުމީ އެއާލައިން މޯލްޑިވިއަން އިން ބޭނުން ކުރަމުންދާ ޑޭޝް8 މަރުކާގެ ފްލައިޓްތަކަކީ ބޮމްބާޑިއާ ކުންފުނިން އުފައްދާފައިވާ ފްލައިޓްތަކެވެ.

މޯލްޑިވިއަންގެ ފްލީޓްގައި ޑޭޝް8-300 ގެ އަށް ފްލައިޓާއި ޑޭޝް8-200 ގެ ދެ ފްލައިޓް އޮވެއެވެ. އޭގެ އިތުރުން މޯލްޑިވިއަންގައި ދެ އެއާބަސް އާއި 11 ސީޕްލޭން އޮވެއެވެ.