އާސަންދަ ބަޖެޓު ހުސްވެއްޖެ

މިއަހަރުގެ ދައުލަތުގެ ބަޖެޓުން، އާސަންދައަށް ކަނޑައެޅި ބަޖެޓު ހުސްވެއްޖެއެވެ.

ފިނޭންސް މިނިސްޓްރީން އާންމުކުރަމުންދާ ތަފާސްހިސާބުތައް ދައްކާ ގޮތުން، އާސަންދައަށް މިއަހަރު ކަނޑައަޅާފައިވަނީ 730.9 މިލިއަން ރުފިޔާއެވެ. މިމަހުގެ ނުވަވަނަ ދުވަހުގެ ނިޔަލަށް، އާސަންދައަށް 795.4 މިލިއަން ރުފިޔާ ހޭދަވެފައިވާ ކަމަށް އެ މިނިސްޓްރީގެ ތަފާސްހިސާބުތަކުން ދައްކައެވެ.

ފިނޭންސް މިނިސްޓްރީގެ ވެބްސައިޓްގައި އާންމުކޮށްފައިވާ، ތަފާސްހިސާބުތައް ދައްކާ ގޮތުން، މިދިޔަ އަހަރުގެ ބަޖެޓުގައި އާސަންދައަށް ކަނޑައަޅާފައިވަނީ 717.8 މިލިއަން ރުފިޔާއެވެ.

މިދިޔަ އަހަރުގެ ޖެނުއަރީ މަހުގެ ފުރަތަމަ ދުވަހުން އެ އަހަރުގެ ޖޫން މަހުގެ ނުވަ ވަނަ ދުވަހުގެ ނިޔަލަށް، އާސަންދައަށް 621.4 މިލިއަން ރުފިޔާ ހޭދަވި ކަމަށް ތަފާސްހިސާބުތަކުން ދައްކައެވެ. 2021 ވަނަ އަހަރު، އާސަންދައަށް 1.56 ބިލިއަން ރުފިޔާ ހޭދަވިއިރު 2020 ވަނަ އަހަރު، އާސަންދައަށް 1.19 ބިލިއަން ރުފިޔާ ހަރަދުވިއެވެ.