"ޓާމިނޭޓާ: ޑާކް ފޭޓް" ފުރަތަމަ ފިލްމުތަކާއި ގުޅުވާލާފައި

ހޮލީވުޑްގެ ރަންޒަމާނުގެ ފިލްމްތަކުގެ ތެރެއިން ޓާމިނޭޓާ ފިލްމްތަކަކީ ވަރަށް ގިނަ ބައެއްގެ މަގުބޫލުކަން ހޯދާފައިވާ ފިލްމްތަކެކެވެ. ޓާމިނޭޓާގެ ފުރަތަމަ ފިލްމް ނެރުނީ 1984 ވަނަ އަހަރުއެވެ. ޖޭމްސް ކެމަރަން ޑައިރެކްޓްކުރި އެ ފިލްމުގެ މައި ރޯލުން ފެނިގެންދިޔައީ އާނޯލްޑް ޝްވާޒެނޭގާއެވެ. މި ފްރެންޗައިޒްގެ އެންމެ ފަހު ފިލްމް ނުކުތީ 2015 ވަނަ އަހަރުއެވެ.

އާނޯލްޑް ބުނާ ގޮތުގައި، "ޓާމިނޭޓާ: ޑާކް ފޭޓް" ގައި އެންމެ ފުރަތަމަ ދެ ފިލްމުން ބެލުންތެރިންނަށް ގެނެސްދިން ކަހަލަ އިހުސާސްތަކާއި އެކްޝަން ފެނިގެންދާނެއެވެ. އަދި ފިލްމާއި މެދު ވަރަށް ހިތްހަމަ ޖެހޭކަމަށްވެސް އާނޯލްޑް ވަނީ ބުނެފައެވެ.

މި ފިލްމު ވަނީ 1991 ވަނަ އަހަރު ނުކުތް "ޓާމިނޭޓާ: ޖަޖްމެންޓް ޑޭ" ގެ ވާހަކައާއި ގުޅުވާލާފައެވެ. އަދި ފުރަތަމަ ދެ ފިލްމުން ފެނިގެންދިޔަ ލިންޑާ ހެމިލްޓަންވެސް މި ފިލްމުން ފެނިގެން ދާނެއެވެ.

މި ފިލްމު ޑައިރެކްޓް ކުރަނީ ޓިމް މިލާއެވެ. ޖޭމްސް ކެމަރަން ފިލްމު ޕްރޮޑިއުސް ކުރުމުގައި ބައިވެރިވެއެވެ. ފިލްމު ރިލީސް ކުރަން ހަމަޖެހިފައިވަނީ އޮކްޓޯބަރު މަހުގެ 25 ގައެވެ.