"ބްލެކް އެޑަމް" އަށް ޑްވޭން ތައްޔާރުވަނީ
ފިލްމް "ބްލެކް އެޑަމް" ގައި ކުޅޭ ރޯލަށް ވާންޖެހޭ ތައްޔާރީތައްވުމުގެ މަސައްކަތް އެކްޓަރު ޑްވޭން ޖޯންސަން (ދަ ރޮކް) ފަށައިފިއެވެ.
މި ފިލްމަކީ މިދިޔަ އަހަރު ރިލީޒްކުރި ސުޕަހީރޯ ފިލްމް "ޝަޒަމް" ގެ ސްޕިނިންގް-އޮފް އެކެވެ.
އެކްޓަރު ޑްވޭން ޖޯންސަން މި ފިލްމްގައި ފެނިގެންދާނީ އެންޓި-ހީރޯއެއްގެ ރޯލުންނެވެ. އިންސްޓަގްރާމްގައި ކުރި ޕޯސްޓަކާއެކު ޑްވޭން ބުނީ ފިލްމަށް ހަދަމުންދާ ތަމްރީންތަކަކީ ވަރަށް އުނދަގޫ ތަމްރީނުތަކެއް ކަމަށެވެ. އަދި މިއަހަރުގެ ހޫނު މޫސުމުގައި ފިލްމްގެ ޝޫޓިން ފެށިގެންދާނެ ކަމަށް ޑްވޭން ވަނީ ހާމަކޮށްފައެވެ.
މިހާރު ހަމަޖެހިފައިވާ ގޮތުން މި ފިލްމް ރިލީޒްކުރާނީ 2021 ވަނަ އަހަރުގެ ޑިސެމްބަރު މަހުގެ ތެރޭގައެވެ.
ޑްވޭން ދެން އެންމެ އަވަހަށް ފެނިގެންދާނީ މި އަހަރު ރިލީޒްކުރުމަށް ހަމަޖެހިފައިވާ ފިލްމް "ޖަންގަލް ކްރޫޒް" އިންނެވެ. މި ފިލްމަކީ ޑިޒްނީ އިން ގެނެސްދޭ ފިލްމެކެވެ.
