ސަންޖޭ ހޮސްޕިޓަލުން ދޫކޮށްލައިފި

އިންޑިއާގެ އެކްޓަރު ސަންޖޭ ދަތަށް ފަރުވާ ދިނުމަށްފަހު ހޮސްޕިޓަލުން ދޫކޮށްލައިފިއެވެ.

އުމުރުން 61 އަހަރުގެ ސަންޖޭ ދަތު ހޮސްޕިޓަލްގައި އެޑްމިޓްކުރީ ނޭވާލާން އުނދަގޫވުމުގެ ސަބަބުން މިދިޔަ ހޮނިހިރު ދުވަހުއެވެ. ހޮނިހިރު ދުވަހު ސަންޖޭ ކުރި ޓްވީޓެއްގައި ބުނީ އޭނާގެ ހާލު ރަނގަޅު ކަމަށާއި ހޮސްޕިޓަލްގައި ބާއްވާފައި އޮތީ އޮބްޒަވޭޝަނަށް ކަމަށެވެ.

ސަންޖޭއަށް ފަރުވާ ދިން ހޮސްޕިޓަލްގެ ޑޮކްޓަރުންނާއި ހަވާލާދީ އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުން، ސަންޖޭއަށް ހޮސްޕިޓަލްގެ އައިސީޔޫގައިވެސް ފަރުވާ ދެވުނެވެ. އެއަށްފަހު ވޯޑަށް ބަދަލު ކުރެވުނު ކަމަށްވެސް ޑޮކްޓަރުންނާއި ހަވާލާދީ އިންޑިއާގެ ނޫސްތަކުން ރިޕޯޓްކޮށްފައިވެއެވެ.

އިންޑިއާގައި ހަލުވިކަމާއެކު ކޮވިޑް-19 ފެތުރެމުންދާއިރު، ކަނޑައަޅާފައިވާ އުސޫލުގެ ދަށުން ކޮވިޑް-19 އަށް ސަންޖޭ ޓެސްޓް ކުރެވުނެވެ. ކޮވިޑް-19 ގެ ނަތީޖާ ނެގެޓިވް ކަމަށްވެސް ސަންޖޭ ވަނީ ބުނެފައެވެ.

ސަންޖޭގެ ކުރިއަށް ހުރި ފިލްމްތަކުގެ ތެރޭގައި "ސަޅަކް 2" ހިމެނެއެވެ.