މާސްކާއި ހެލްމެޓް ނާޅައި ސައިކަލު ދުއްވުމުން ވިވެކް ޖޫރިމަނާކޮށްފި
މާސްކް އަދި ހެލްމެޓް ނާޅައި ސައިކަލު ދުއްވުމުގެ ސަބަބުން، އިންޑިއާގެ އެކްޓަރު ވިވެކް އޮބްރޯއީ ޖޫރިމަނާކޮށްފިއެވެ.
އުމުރުން 44 އަހަރުގެ ބަތަލު އިއްޔެ ކުރި ޓްވީޓެއްގައި ބުނީ މިމަހުގެ 14 ވަނަ ދުވަހު އަންހެނުންނާއެކު، އައު ސައިކަލެއްގައި ހެލްމެޓް ނާޅައި ދުއްވަމުން ދަނިކޮށް މުމްބާއީ ފުލުހުން އޭނާ ޖޫރިމަނާކޮށްފައިވާ ކަމަށެވެ.
ސަލާމަތާއި ރައްކާތެރިކަމަކީ އެންމެ މުހިންމު ކަންތައްކަން ވިސްނައިދިނީތީ ވިވެކް ވަނީ މުމްބާއީ ފުލުހުންނަށް ޝުކުރު އަދާކޮށްފައެވެ. އެހެން މީހުންވެސް މާސްކާއި ހެލްމެޓް އެޅުމަށް ވިވެކްގެ ޓްވީޓްގައި ވަނީ އެދިފައެވެ.
އިންޑިއާގެ ނޫސްތަކުން ރިޕޯޓްކޮށްފައިވާ ގޮތުން، ވިވެކް ކުރި ދެ ކުށަކީ ހަ މަހަށް ޖަލަށްލުން ނުވަތަ ޖޫރިމަނާކުރުން ނުވަތަ ޖަލަށްލުމާއެކު ޖޫރިމަނާގެ އަދަބު އަތުވެދާނެ ދެ ކުށެވެ.
ވިވެކް އެންމެ ފަހުން ފެނިގެންދިޔަ އެއް ފިލްމަކީ އިންޑިއާގެ ބޮޑުވަޒީރު ނަރެންދްރަ މޯދީގެ ހަޔާތަށް ބިނާކޮށް އުފައްދާފައިވާ ފިލްމް "ޕީއެމް ނަރެންދްރަ މޯދީ" އެވެ.
