ހާލުގައި ޖެހިފައިވާ ފަރާތްތަކަށް ސަލްމާން ޙާން އެހީވެއްޖެ

މަހާރާޝްތުރާގައި ފެން ބޮޑުވެފައިވާ ސަރަހައްދުތަކުގައި ދިރިއުޅޭ މީހުންނަށް ބޭނުންވާ އަސާސީ ތަކެތި، ސަލްމާން ޙާން ފޯރުކޮށްދީފިއެވެ.

ބޮލީވުޑްގެ ޚަބަރުތައް ގެނެސްދޭ ނޫސްތަކުން ރިޕޯޓްކޮށްފައިވާ ގޮތުން، ސަލްމާން ޙާން ވަނީ 500 ކިޓް ހަދިޔާކޮށްފައެވެ. ކޮންމެ ކިޓެއްގައި ފަސް ކިލޯގެ ހަނޑޫ އާއި ފަސް ކިލޯގެ ފުށް ހިމެނެއެވެ. އޭގެ އިތުރުން ކޮންމެ ކިޓެއްގައި ސައިފަތާއި ދެ ކިލޯ މުގު އަދި އެއް ލީޓަރުގެ ތެޔޮ ހިމެނެއެވެ.

ސަލްމާން ޙާން ވަނީ މިނަރަލް ފެންފުޅީގެ 50،000 ފުޅި އާއި 50،000 ބިސްކޯދު ޕެކެޓްވެސް ބަހާފައެވެ. އޭގެ އިތުރުން 5000 ސެނިޓަރީ ނެޕްކިންވެސް ބަހާފައިވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާ ގޮތުން، ސަލްމާން ޙާން ވަނީ، ހާލުގައި ޖެހިފައިވާ މީހުންނަށް ބޭނުންވާ އެހެން ތަކެއްޗަކީ ކޮބާތޯ ސުވާލުކޮށްފައެވެ. ކުރިއަށް އޮތް ތަނުގައި އަންނައުނާއި އެހެނިހެން ތަކެތި ފޯރުކޮށްދޭނެ ކަމަށް ސަލްމާން ޙާން ބުނެފައިވާ ކަމަށް ރިޕޯޓްތައް ބުނެއެވެ.