"ފަސް އަންހެން ކުދިންގެ ރޯލު ކުޅެވުމުގެ އިހުސާސް ކުރެވުނު"
ފިލްމް "ދަ ގާލް އޮން ދަ ޓްރެއިން" ގައި ފަސް އަންހެން ކުދިންގެ ރޯލު ކުޅެވުމުގެ އިހުސާސް ކުރެވުނު ކަމަށް ބަތަލާ ޕަރްނީތި ޗޯޕްރާ ބުނެފިއެވެ.
އިންޑިއާގެ ނޫހަކަށް ދިން އިންޓަވިއުއެއްގައި ބަތަލާ ޕަރްނީތި ބުނީ "ދަ ގާލް އޮން ދަ ޓްރެއިން" ގައި ކުޅެފައިވާ ރޯލަކީ، މީގެ ކުރިން ކުޅެފައިވާ ރޯލެއް ނޫން ކަމަށެވެ. މި ފިލްމްގައި ޕަރްނީތި ފެނިގެންދާނީ މީރާ ކަޕޫރްގެ ރޯލުންނެވެ.
ޕަރްނީތި ބުނި ގޮތުގައި، ފިލްމްގައި މީރާ ކަޕޫރަށް ކޮންމެ ސީނެއްގައި އާ މައްސަލަތަކެއް ދިމާވެއެވެ. ފިލްމްގައި އުޅޭ އެހެން ކެރެކްޓާތަކާއި މީރާ ކަޕޫރާއި އޮންނަނީ ތަފާތު ރިލޭޝަންޝިޕްއެއް ކަމަށާއި ކައިރީގައި ހުންނަ މީހާގެ ސަބަބުން ތަފާތު މީހެއްގެ ރޯލު ކުޅެން ޖެހުނު ކަމަށް ޕަރްނީތި ބުންޏެވެ. އެހެންކަމުން މި ފިލްމްގައި ފަސް އަންހެން ކުދިންގެ ރޯލު ކުޅެވޭ ކަމުގެ އިހުސާސް ކުރެވުނު ކަމަށް ޕަރްނީތި ބުންޏެވެ.
ބަތަލާ ޕަރްނީތި ބުނީ އެކްޓަރުންނަށް ގިނަފަހަރު ފިލްމަކުން ރޯލެއް ލިބެނީ، އެ އެކްޓަރަކު ކުރިން ކުޅެފައިވާ ރޯލަކަށް ބެލުމަށްފަހު ކަމަށާއި ކުރިން ކުޅެފައިނުވާ ރޯލެއް ލިބެނީ މަދު ފަހަރަކު ކަމަށެވެ. ފިލްމްގެ ސްކްރިޕްޓް ލިޔާއިރު، ބޭނުންވަނީ ވަކި ކެރެކްޓާއެއް ކަމަށް ނިންމާ ކަމަށާއި ފިލްމަށް ހޯދަނީ ކުރިން އެފަދަ ކެރެކްޓާއެއް ފިލްމެއްގައި ކުޅެފައިވާ އެކްޓަރެއް ކަމަށްވެސް ޕަރްނީތި ބުންޏެވެ.
އިޝަގްޒާދޭ، ހަސީ ތޯ ޕަސީ، ގޯލްމާލް އަގެއިން ފަދަ ފިލްމްތަކުން ފެނިގެންދިޔަ ޕަރްނީތި ގަބޫލުކުރާ ގޮތުގައި ފިލްމް "ދަ ގާލް އޮން ދަ ޓްރެއިން" ގައި ކުޅެން ލިބުނު ރޯލަކީ އޭނާގެ ކެރިއަރުގައި ލިބުނު ބޮޑު ފުރުސަތެކެވެ. ފިލްމް އުފައްދާ ފަރާތުން އޭނާއަށް އެކަން ކުރެވޭނެ ކަމަށް ގަބޫލުކޮށް ފުރުސަތު ދިނުމުން ޝުކުރުވެރިވާ ކަމަށްވެސް ޕަރްނީތި ވަނީ ބުނެފައެވެ.
މި ފިލްމަކީ ޕައުލާ ހައުކިންސް ލިޔެފަައިވާ ވާހަކައަކަށް އުފައްދާ ފިލްމެކެވެ. މި ފިލްމުން އަދިތީ ރާއޯ ހައިދްރީ، ކްރިތީ ކުލާރީ، އަވިނާޝް ތިވާރީ ފެނިގެންދާނެއެވެ.
