ކަސްރަތުން ހަށިގަނޑާއި ސިކުނޑީގެ ހަކަތަ އިތުރުކޮށްދޭ
ބައެއް މީހުންނަށް ބެލެވިފައި އޮންނަ ގޮތުން، ކަސްރަތުކުރުމަކީ ޖިމަށް ގޮސްގެން ކުރެވޭ ކަމެކެވެ. ނަމަވެސް ކަން އޮތީ އެހެންނެއް ނޫނެވެ. ހިނގުމާއި، ފެތުމުގެ އިތުރުން ސިޑިން އަރާ ފޭބުމަކީވެސް ކަސްރަތެކެވެ.
ކަސްރަތުކުރުމުން ތިމާގެ ހަށިގަނޑާއި ވިސްނުމަށްވެސް ގިނަ ފައިދާތަކެއް ކުރެއެވެ. ދުޅަހެޔޮ ސިއްހަތެއް ލިބުމަކީ އުމުރު ދިގުވުމަށް އެހީވެދޭ ކަމެކެވެ.
ޑިޕްރެޝަން ފަދަ ކަންކަން ތަހައްމަލުކުރަމުންދާ ފަރާތްތަކުން، ގަވާއިދުން ކަސްރަތުކުރުމަށް ކަމާބެހޭ މާހިރުން ލަފާދެއެވެ. މާހިރު ބުނާ ގޮތުގައި ގަވާއިދުން ކަސްރަތުކުރާ ނަމަ ޑިޕްރެޝަން އަދި ސްޓްރެސްއާ ދުރުކޮށްދޭނެއެވެ.
ބަރުދަން ލުއިކުރަން ބޭނުންވާ ފަރާތްތަކުންވެސް، ރަނގަޅު މީލް ޕްލޭނެއް ނެގުމާއެކު ކަސްރަތު ކުރަން ޖެހޭނެއެވެ. ބަރުދަން ލުއިކުރުން އެންމެ ރަނގަޅަށް މަސައްކަތްކުރާނީ ކަސްރަތާއި ކެއިންބުއިމަށް ގެނެވޭ ރަނގަޅު ބަދަލާއެކުއެވެ.
ކަސްރަތުކުރުމަކީ ތިމާގެ ހަށިގަނޑުގެ މަސްތަކާއި ކަށިތައް ވަރުގަދަކޮށްދޭ ކަމެކެވެ. މަސްތަކާއި ކަށިތައް ވަރުގަދަކުރުމަށް އެކަމަށް ހާއްސަ ކަސްރަތުކުރަން ޖެހޭއިރު، ގަވާއިދުން ކަސްރަތު ކުރުމުން ހަށިގަނޑުގެ ބުންވަރު ރަނގަޅުކޮށްދީ ހަކަތަ އިތުރުކޮށްދެއެވެ.
