ބުރަކޮށް އުޅެމުންވެސް ދަރިފުޅާއެކު ފައިދާހުރި ވަގުތުކޮޅެއް ހޭދަކޮށްލެވިދާނެ
އަދާކުރާ ވަޒީފާގެ ގޮތުން ބައެއް ބެލެނިވެރިން މަސައްކަތް ކުރަން ޖެހިފައިވަނީ ލޯބިވާ ދަރިފުޅާ ދުރުގައި ތިބެގެންނެވެ. އަނެއްބައި ބެލެނިވެރިންނަކީ ދަރިފުޅު ގާތުގައި ތިބެގެން މަސައްކަތް ކުރާ މީހުންނެވެ. ނަމަވެސް ވަޒީފާގައި ބުރަކޮށް އުޅެން ޖެހުމުން ގިނަ ބެލެނިވެރިންނަށް އެ މީހުންގެ ލޯބިވާ ދަރިފުޅާއެކު ވަގުތުކޮޅެއް ހޭދައެއް ނުކުރެވެއެވެ.
ދަރިފުޅާއެކު ވަގުތު ހޭދަކުރުމަކީ އޭގެ އެދެވޭ ރަނގަޅު ނަތީޖާ ވަރަށް ގިނަ ގޮތް ގޮތުން ދަރިފުޅަށް ކުރާނެ ކަމެކެވެ. އެގޮތުން ދަރިފުޅުގެ ކިޔެވުމާއި އަހުލާގާއި ދަރިފުޅުގެ ސިއްހަތަށްވެސް ރަނގަޅު ބަދަލުތަކެއް އަންނާނެއެވެ. އެހެންކަމުން ކޮންމެ ދުވަހަކުވެސް ދަރިފުޅާއެކު ވަގުތުކޮޅެއް ހޭދަކޮށްލުން މުހިންމެވެ.
ބައެއް ބެލެނިވެރިންނަކީ ދަރިފުޅާއި ދުރުގައި، އެހެން ރަށެއްގައި ތިބެގެން މަސައްކަތް ކުރާ މީހުންނެވެ. މިފަދަ ބެލެނިވެރިން ދަރިފުޅާއެކު ވަގުތު ހޭދަކޮށްލުމަށް ކޮންމެ ދުވަހަކުވެސް ވީޑިއޯ ކޯލަކުން ދަރިފުޅާ ވާހަކަ ދައްކާލެވޭތޯ ބަލާށެވެ.
ދަރިފުޅު ގާތުގައި ތިބެގެން މަސައްކަތް ކުރާ ބެލެނިވެރިންނަކީވެސް ވަރަށް ބުރަކޮށް އުޅޭ މީހުންނެވެ. ނަމަވެސް ކޮންމެ ދުވަހަކުވެސް ދަރިފުޅާ ބައްދަލުކޮށް ވާހަކަ ދައްކާލުމަށް ވަގުތު ކޮޅެއް ހޭދަކޮށްލާށެވެ.
ބިޒީކޮށް އުޅުމަށްފަހު، ދަރިފުޅާއެކު ހޭދަ ކުރާ ވަގުތަކީ ބޭނުންތެރި ވަގުތަކަށް ހެދުމަށް މަސައްކަތް ކުރާށެވެ. ފޯނު ކޯލްތަކާއި ދުރުވާށެވެ. ސޯޝަލް މީޑިއާ ފަދަ އެޕްލިކޭޝަންތަކާއި ދުރުވެ، ލިބުނު ވަގުތުގެ ބޭނުން ހިފައި އެ ވަގުތު ދަރިފުޅަށް ހާއްސަ ކުރާށެވެ.
ދަރިފުޅާއެކު ހޭދަކޮށްލާ ވަގުތުގައި، އެ ދަރިފުޅު ކުރަން ބޭނުންވާ ކަމެއް އޮތްތޯ ބަލައި އެކަމެއް ކޮށްލެވިދާނެއެވެ. އެގޮތުން ފިލާވަޅު ހެދުން، ފޮތެއް ކިޔާލުން ނުވަތަ ކެއުމަކަށް އިންސާފުކޮށްލެވިދާނެއެވެ.
